Heildarhagnaður Nýherja 56 milljónir

Nýherji skilaði 56 milljóna króna heildarhagnaði á fyrsta fjórðungi ársins og er afkoman betri en áætlanir gerðu ráð fyrir, samkvæmt tilkynningu frá fyrirtækinu.

„Síðastliðið haust var félaginu mörkuð ný stefna sem í fólst einföldun og hagræðingu á starfsemi með sölu eigna sem hafði litla samlegð með annarri starfsemi. Að auki var lögð áhersla á að styrkja þjónustu og efla lausnaframboð á fyrirtækjamarkaði á Íslandi.

Þessi vinna er farin að skila sýnilegum árangri í bættri afkomu. Við erum sátt við uppgjör Nýherja á þessum fyrsta ársfjórðungi 2014 og munum halda áfram á þeirri braut sem nú hefur verið mörkuð," segir Finnur Oddsson forstjóri Nýherja.

Þá segir í tilkynningunni að horfur hjá Nýherjasamsteypunni séu ágætar og gert sé ráð fyrir áframhaldandi vexti í tekjum og afkomu dótturfélaga. Áfram verði unnið að einföldun og styrkingu rekstrar Nýherja innanlandsmarkaði.

Heildarhagnaður Nýherja var, eins og áður hefur komið fram, 56 milljónir króna. Vöru- og þjónustusala á fjórðunginum var 2.859 milljónir króna. EBITDA Nýherja var 191 milljón króna. Framlegð var 753 milljónir króna. Handbært fé frá rekstri var 141 milljón króna.

Afkoma allra félaga samstæðunnar var í takt við áætlanir og Nýherji seldi alla starfsemi sína í Danmörku á fyrsta ársfjórðungi.