Á að efla eftirlit með kerfislegri áhættu

Frumvarp Bjarna Benediktssonar fjármálaráðherra um stofnun fjármálastöðugleikaráðs, sem fengi ríkar valdheimildir til að afla upplýsinga úr bankakerfinu og framkvæma áhættumat fyrir bankakerfið, nýtur stuðnings allra sem hafa skilað inn umsögn til efnahags- og viðskiptanefndar Alþingis.

Í skýrslu rannsóknarnefndar Alþingis um fall viðskiptabankanna sem kom út 12. apríl 2010 er rakið að samstarf Fjármálaeftirlitsins og Seðlabankans hefði þurft að vera mun nánara í aðdraganda fjármálakreppunnar haustið 2008.

Þetta samstarf var ófullnægjandi jafnvel þótt mælt væri fyrir um samstarf þessara stofnana og upplýsingaskipti bæði í lögum um Seðlabanka Íslands og í lögum um opinbert eftirlit með fjármálastarfsemi.

Frumvarp fjármálaráðherra um fjármálastöðugleikaráð er ætlað að bæta úr þessu, en lögð voru drög að frumvarpinu á síðasta kjörtímabili. Hlutverk ráðsins er að vera formlegur samstarfsvettvangur stjórnvalda um fjármálastöðugleika - og samhæfa stefnumótun og viðbúnað opinberra aðila við fjármálakreppu.

Samkvæmt frumvarpinu mun ráðið skipa fjármálaráðherra, verður jafnframt formaður ráðsins, seðlabankastjóri og forstjóri Fjármálaeftirlitsins. Undir ráðinu mun síðan starfa sérstök kerfisáhættunefnd.

Í kerfisáhættunefndinni verða seðlabankastjóri og forstjóri FME auk framkvæmdastjóra fjármálastöðugleikasviðs Seðlabankans, aðstoðarforstjóra FME og þá verður í þessari nefnd einn sérfræðingur í málefnum fjármálamarkaða, skipaður af ráðherra.

Vakin er athygli á því í Morgunblaðinu að allar umsagnir sem borist hafa um frumvarpið eru jákvæðar.

„Með þessu frumvarpi er brugðist við þessari meginveilu sem kom í ljós í kjölfar fjármálakreppunnar. Það var skortur á tengslum þessara stofnana sem stunda  heildareftirlit sem Seðlabankinn og eindareftirlitið hjá Fjármálaeftirlitinu og það virtist vera sem enginn einn hafi haft þessa heildaryfirsýn. En nú verður þetta fjármálastöðugleikaráð sem mun hittast reglulega  og menn munu þá hafa samráð og samvinnu um þetta eftirlit, “ segir Frosti Sigurjónsson, formaður efnahags- og viðskiptanefndar Alþingis.

Ljóst er að frumvarpið þýðir að ekki verður stefnt að sameiningu FME og Seðlabankans á næstunni því gert er ráð fyrir því að stofnanirnar verði áfram aðskildar.

„Þetta er mjög einfalt og fljótlegt að gera, á meðan það að sameina Seðlabanka og Fjármálaeftirlitið þyrfti mjög vandaðan undirbúning og ítarlegan. En með þessu er hægt að bregðast strax við og þá er alveg sjálfsagt að gera það hvað sem síðar verður. “