FleXicut vél Marel slær í gegn í Brussel

Forstjóri Marel segir sjávarútvegssýninguna í Brussel sjaldan hafa verið eins sterka fyrir fyrirtækið og í ár. Íslendingar taka þátt á sýningunni í 22. sinn.

Sjávarútvegssýningin í Brussel hófst í gær en 38 íslensk fyrirtæki kynna þar framleiðslu sína og þjónustu. Um 25 þúsund manns heimsækja hátíðina árlega og nýta mörg fyrirtæki tækifærið til að hitta viðskiptavini og jafnvel að handsala samninga.

Marel kynnti á sýningunni í ár ný tæki sem hafa vakið athygli. Nú þegar hafa þrjú fyrirtæki keypt nýju FleXicut vélina frá Marel sem gæti valdið straumhvörfum í hvítfiskvinnslu.

Vélin greinir beingarð í hvífiski sem hingað til hefur reynst erfitt og sker beingarðinn svo burt með vatnsskurði. FleXicut vélin kostar hálfa milljón evra eða um 85 milljónir króna.

„Það merkilega við fyrirtækið Marel er að við erum líka í kjúklinga og kjötiðnaði og sú vara sem við vorum að þróa með HB Granda er upprunin úr kjúlkingabransanum,“ segir Árni Oddur Þórðarson, forstjóri Marel.

„Vonandi náum við núna að auka virði íslensks sjávarfangs í útflutningi með að gera verðmætari vöru úr afskurði.“

Fyrirferðamiklir í Brussel

Marel er með stærsta sýningasvæðið af íslensku fyrirtækjunum og hefur fengið mikla athygli sýningargesta. „Þetta er frábær sýning og er væntanlega sú sterkasta í 6-7 ár. Hér erum við að ná í nýja viðskiptavini. Þó við séum í Brussel þá erum við að ná í viðskiptavini í Afríku, Suður-Ameriku og í Asíu. Svo hittum við eldri viðskiptavini sem er ekki síður skemmtilegt,“ segir Árni Oddur.

„Ég held að Marel hafi aldrei kynnt eins framúrstefnulegar nýjungar líkt og við gerum á þessari sýningu.“