Gjöld á áfengi og bensín lækka of lítið og of seint

„Þetta mál er búið að vera í þessum dæmalausa tómagangi og áhugaleysi ríkisstjórnar og þingnefndar að ljúka þessu máli er eftirtektarvert,“ segir Gylfi Arnbjörnsson, forseti Alþýðusambands Íslands (ASÍ).

Gylfi gagnrýnir að frumvarp fjármálaráðherra sem á að lækka gjöld á áfengi, tóbak og eldsneyti hefur ekki enn verið afgreitt á Alþingi. Ríkisstjórnin samdi við aðila vinnumarkaðarins um lækkanirnar við gerð kjarasamninga í desember. Þá hafði verið tilkynnt um þriggja prósenta ­hækkun á gjöldunum frá ára­mótum en í frumvarpinu hækka þau einungis um tvö prósent. Breytingarnar áttu upphaflega að taka gildi 1. febrúar en málið hefur tafist og nú er stefnt að gildistöku 1. júní næstkomandi.

„Þetta hefur tekið fleiri fleiri mánuði og þessi seinkun er að rýra þessar aðgerðir verulega því það gefur augaleið að almenningur í landinu er ekki enn farin að njóta lægri gjalda. Hins vegar var það okkar tillaga í upphafi að nota þessa fjármuni til að lækka gjaldtöku í heilbrigðiskerfinu sem er farin að taka út yfir allan þjófabálk,“ segir Gylfi.

Pétur H. Blöndal, alþingis­maður og framsögumaður meirihluta efnahags- og viðskiptanefndar í málinu, segist viss um að frumvarpið verði afgreitt fyrir þinglok 16. maí. Hann segir málið hafa fengið of langa umfjöllun í þinginu miðað við umfang aðgerðanna.

„Ég er alltaf sammála öllum skattalækkunum. Hins vegar er ég með efasemdir um hvað þetta er lítið því ef þetta á að virka þarf að lækka gjöld talsvert svo þau hafi áhrif á verðlag. En þetta er hluti af kjarasamningum og sumir aðilar vinnumarkaðarins líta stíft á svona smáskammtalækningar,“ segir Pétur. Hann bætir við að verðbólga hér á landi hafi verið undir 2,5 prósentum frá áramótum þó að til gjaldskrárlækkananna hafi ekki komið.

Pétur segir aðgerðirnar koma til með að lækka skatta um tvö til þrjú hundruð milljónir króna. Erfitt verði að fylgjast með því hvort lækkanirnar skili sér út í verðlagið.

„Það er ekki nokkur lifandi vegur að fylgjast með því. Þú ert með frjálsa álagningu til dæmis á bensíni og þegar menn fá tilboð um afslátt af bensíni upp á tíkall á lítra þá hverfur þetta gjörsamlega.“