82 þúsund króna launamunur á milli kynja

Regluleg mánaðarlaun fullvinnandi launamanna á íslenskum vinnumarkaði voru 436 þúsund krónur að meðaltali árið 2013. Þetta kemur fram á vefsíðu Hagstofunnar.

Algengast var að regluleg laun væru á bilinu 250-300 þúsund krónur og voru ríflega 17 prósent launamanna með regluleg laun á því bili. Þá voru rúmlega 75 prósent launamanna með regluleg laun undir 500 þúsund krónum á mánuði. Regluleg laun karla voru 475 þúsund krónur að meðaltali og regluleg laun kvenna 393 þúsund krónur. Launamunur á milli kynja var því 82 þúsund krónur.

Heildarlaun fullvinnandi launamanna voru 526 þúsund krónur að meðaltali á mánuði árið 2013. Algengast var að heildarlaun væru á bilinu 400-450 þúsund og voru tæplega 14% launamanna með laun á því bili. Þá voru tæplega 60 prósent með heildarlaun undir 500 þúsund krónum á mánuði. Heildarlaun karla voru 591 þúsund krónur að meðaltali og heildarlaun kvenna 457 þúsund krónur.  Launamunur á milli kynja var 134 þúsund.