Einstæðir karlar í verri fjárhagsstöðu en einstæðar konur

Karlar sem búa einir eru staddir verr fjárhagslega en konur sem búa einar. Þetta kemur fram á vefsíðu Hagstofu Íslands. Hlutfall Íslendinga sem mældist fyrir neðan lágtekjumörk var 9,3 prósent árið 2013, en mörkin eru skilgreind sem 60 prósent af miðgildi ráðstöfunartekna heimila.

Þegar litið er til fjölskyldugerða eru einstæðir foreldrar líklegastir til að lenda fyrir neðan lágtekjumörk en rúm 27 prósent þeirra voru fyrir neðan mörkin.

Karlar sem búa einir voru líklegri en konur sem búa einar til að lenda fyrir neðan lágtekjumörk. Þá voru rúmlega 23 prósent einstæðra karla fyrir neðan mörkin á móti níu prósent einstæðra kvenna.

Leigjendur voru mun líklegri en húseigendur til að lenda fyrir neðan lágtekjumörk, eða tæp 22,4 prósent á móti 5,8 prósent eiganda.