Hagnaður af Hörpu

Hagnaður varð af rekstri tónlistar- og ráðstefnuhússins Hörpu upp á 172 milljóna króna í fyrra, samanborið við 1.419 milljóna tap árið 2012.

Tap af rekstrinum án fjármagnsliða fór úr 585 milljónum árið 2012 í 360 milljónir að meðtöldu framlagi eigenda á árinu 2013. Samkvæmt tilkynningu frá Hörpu er sú upphæð áþekk fasteignagjöldunum sem félaginu er gert að greiða. Aðalfundur félagsins var haldinn í gær.

Eigin tekjur Hörpu jukust úr 644 milljónum í 873 milljónir, sem er 26 prósenta tekjuaukning. Gjöld aukast einnig um 175 milljónir þannig að félagið bætir reksturinn um 55 milljónir króna frá fyrra ári.

Á árinu 2013 komu 1,3 milljónir gesta í húsið samanborið við 1 milljón á árinu 2012. Tónleikar og listviðburðir voru 489 samanborið við 387 árið 2012, en fundir, ráðstefnur og veislur voru 320 en 250 árið áður. Alþjóðlegar ráðstefnur voru 15 samanborið við 12 árið áður og er áætlað að ráðstefnuhald Hörpu hafi skilað allt að 4,5 milljörðum króna í gjaldeyristekjur. Nýting á sölum Hörpu var 67 prósent á árinu 2013.

Á aðalfundinum var ákveðið að fækka í stjórn úr sjö í fimm. Í stjórn voru kjörin Guðfinna S. Bjarnadóttir sem formaður og meðstjórnendurnir Svanhildur Konráðsdóttir, Kjartan Örn Ólafsson, Vilhjálmur Egilsson og Ásta Möller. Forstjóri Hörpu er Halldór Guðmundsson.