Tekjur Actavis jukust um 40% á fyrsta ársfjórðungi

Í morgun kynnti Actavis plc, móðurfélag Actavis á Íslandi, afkomu sína fyrir fyrsta ársfjórðung 2014.

Tekjur á fyrsta ársfjórðungi jukust um 40% í 2,66 milljarða Bandaríkjadala, samanborið við 1,9 milljarða á sama tímabili árið 2013.

Hagnaður á hlut hækkaði um 75% í 3,49 dali á fyrsta ársfjórðungi 2014, samanborið við 1,99 dali á sama tímabili í fyrra, ef ekki er tekið tillit til óvenjulegra liða.

Hagnaður fyrir fjármagnsliði, skatta og afskriftir nam 860 milljónum dala á fyrsta ársfjórðungi 2014, samanborið við 464 milljónir dala á fyrsta ársfjórðungi 2013. Handbært fé og markaðsverðbréf nam 340 milljónum dala þann 31. mars 2014.

Áhersla á fjárfestingu í rannsóknum og þróun hélt áfram á fyrsta ársfjórðungi sem leggur grunninn að metnaðarfullum markmiðum félagsins um framtíðarvöxt.

Í takt við þau áform félagsins, má segja að hápunktur fyrsta ársfjórðungs hafi verið tilkynning um kaup Actavis á Forest Laboratories í febrúar sl.