Noregur áfram helsti áfangastaður brottfluttra Íslendinga

326. 340 manns bjuggu á Íslandi í lok fyrsta ársfjórðungs 2014. Þar af 163.660 karlar og 162.680 konur. Á ársfjórðunginum fjölgaði landsmönnum um 720 einstaklinga.

Alls fæddust 1.060 börn, 540 létust og náttúruleg fjölgun var því 520. Þá fluttust 190 einstaklingar til landsins umfram þá sem fluttu af landi.

Þetta kemur fram á vef Hagstofu Íslands.

Brottfluttir einstaklingar með íslenskt ríkisfang voru 200 umfram þá sem fluttu til landsins, en aðfluttir erlendir ríkisborgarar voru 380 fleiri en þeir sem fluttu frá landinu. Í lok ársfjórðungsins voru erlendir ríkisborgara á Íslandi 23.060 talsins.

Sem áður er Noregur helsti áfangastaður brottfluttra íslenskra ríkisborgara, en þangað fluttu 240 manns á ársfjórðungnum. Til Danmerkur, Noregs og Svíþjóðar fluttust 490 íslenskir ríkisborgarar af 700 alls.

Af þeim 500 erlendu ríkisborgurum sem fluttust frá landinu fóru flestir til Póllands, eða 120 manns.

Flestir aðfluttir Íslendingar komu frá Danmörku, Noregi og Svíþjóð, samtals 380 af 500 manns. Þá var Pólland upprunaland flestra erlendra ríkisborgara, en þaðan fluttust 260 af 890 erlendum innflytjendum.