HB Grandi á markað í dag

Viðskipti með hlutabréf HB Granda hf. hefjast á Aðalmarkaði NASDAQ OMX Iceland. HB Grandi tilheyrir Neysluvörugeiranum og flokkast sem miðlungsstórt félag. Viðskipti með félagið verða undir auðkenninu GRND.

HB Grandi er áttunda félagið sem skráð er á Aðalmarkaði NASDAQ OMX Nordic á árinu og annað félagið á NASDAQ OMX Iceland.

HB Grandi sem er eitt stærsta sjávarútvegsfélag landsins framleiðir vöru úr fersku hráefni sem aflað er úr hafinu við Ísland.Félagið gerir út tíu fiskiskip og vinnur fiskafurður bæði á sjó og í landi á þremur stöðum á Íslandi.

Félagið hefur mestu aflaheimildir íslenskra útgerðarfélaga og rekur eigin markaðsdeild sem selur afurðirnar um allan heim. Aðallega til Evrópu, Asíu og Norður-Ameríku.

Spennandi tímar í sögu félagsins

Hjá HB Granda starfa um 900 manns. „Þetta eru spennandi tímar í sögu HB Granda.“ segir Vilhjálmur Vilhjálmsson, forstjóri HB Granda.

„Skráningin hefur gert okkur kleift að ná markmiði okkar um dreifðara eignarhald og við erum afskaplega ánægð með niðurstöður hlutafjárútboðsins. HB Grandi er eitt stærsta sjávarútvegsfyrirtæki landsins og við erum stolt af því að geta boðið Íslendingum upp á tækifæri til að taka þátt í framtíðarverkefnum með okkur.“

„Skráning HB Granda á Aðalmarkaðinn markar tímamót á margan hátt.” sagði Páll Harðarson, forstjóri NASDAQ OMX Iceland. „Félagið er það fyrsta á Íslandi sem færir sig frá First North yfir á Aðalmarkaðinn, en ekki síst, þá er HB Grandi fyrsta sjávarútvegsfélagið í mörg ár sem kemur á markað.“

„Það er mjög mikilvægt að ein af undirstöðuatvinnugreinum landsins sé á markaði, þannig að bæði stærri og smærri fjárfestum séu veitt tækifæri til að fjárfesta í henni. Við bjóðum HB Granda velkomið og við hlökkum til að styðja við félagið á nýrri vegferð þess sem skráð félag,” segir Páll.