24,9% heimila í leiguhúsnæði

Alls 24,9 prósent heimila voru í leiguhúsnæði á almennum markaði árið 2013 samanborið við 15,4 prósent heimila árið 2007. 

„Árið 2007 var hlutfall heimila í leiguhúsnæði á almennum markaði svipað og hlutfall heimila í leiguhúsnæði í gegnum hverskyns búsetuúrræði á borð við félagslegar leiguíbúðir sveitarfélaga og námsmannahúsnæði, eða 7,6% samanborið við 7,8%. Fjölgunin var hinsvegar meiri í fyrrnefnda hópnum og árið 2013 voru 14,2% heimila í leiguhúsnæði á almennum markaði en 10,7% í búsetuúrræði," segir í frétt á vef Hagstofu Íslands. 

Þar segir að samsetning leigjenda á almennum markaði hafi einnig breyst, bæði hvað varði aldur, heimilisgerðir og tekjur. „Eftir 2007 óx hlutfall fólks á aldrinum 25-34 ára á almennum leigumarkaði hraðar en í eldri aldurshópum, úr 8,6% í 23,7%. Á sama tíma hækkaði hlutfall leigjenda á almennum markaði í lægsta tekjubilinu hraðar en á hærri tekjubilum, úr 9,5% í 28,9%. Þá hækkaði hlutfallið á meðal heimila einhleypra með eitt eða fleiri börn úr 9,7% í 27,7%, sem er meiri aukning en mælist fyrir aðrar heimilisgerðir."