Rekstrarhagnaður Össurar tvöfaldast á milli ára

Hagnaður stoðtækjafyrirtækisins Össurar hf. jókst um 96% milli ára.

Hagnaðurinn nam 11 milljónum Bandaríkjadala og 9% af sölu, samanborið við 6 milljónir dala og 6% af sölu á fyrsta ársfjórðungi 2013. Þetta kemur fram í afkomutilkynningu frá félaginu.

Sala nam 121 milljón Bandaríkjadala, samanborið við 97 milljónir dala á sama tímabili 2013.

Söluvöxtur var 24%, þar af 6% innri vöxtur, hvortveggja mælt í staðbundinni mynt.

Sala á spelkum og stuðningsvörum jókst um 28%, þar af 2% innri vöxtur, hvort tveggja mælt í staðbundinni mynt. Sala á stoðtækjum jókst um 19%, þar af 12% innri vöxtur, hvort tveggja mælt í staðbundinni mynt.

Framlegð nam 76 milljónum Bandaríkjadala og 63% af sölu, samanborið við 60 milljónir Bandaríkjadala og 62% af sölu á fyrsta ársfjórðungi 2013

„Niðurstöður fyrsta ársfjórðungs eru í takt við okkar væntingar. Við sjáum enn einn ársfjórðunginn þar sem arðsemin er mjög góð og rekstrarhagnaður tvöfaldast á milli ára,“ segir Jón Sigurðsson, forstjóri Össurar.

Hann segir að aðhaldsaðgerðir sem fyrirtækið fór í á síðasta ári og endurhönnun á ferlum hafi haft jákvæð áhrif.

„Einnig er ánægjulegt að sjá að markaðsskilyrði á stoðtækjamarkaðnum í Bandaríkjunum er að þróast í rétta átt. Sölu vöxtur í EMEA heldur áfram að vera stöðugur. Í byrjun apríl framlengdum við lánasamning félagsins um þrjú ár, eða fram til ársins 2019 og endurspegla lánakjörin sterka fjárhagslega stöðu Össurar og góðar framtíðarhorfur."