Marel sagði upp 75 starfsmönnum

Marel hefur birt uppgjör fyrir fyrsta fjórðung ársins 2014 en þar kemur fram að tekjur fyrirtækisins á tímabilinu námu 154,8 milljónum evra.

EBITDA, leiðrétt fyrir kostnaði vegna hagræðingaraðgerða var 11,6 milljónir evra, sem er 7,5% af tekjum. EBITDA var 8,1 milljón evra sem er 5,2% af tekjum.

Fram kemur í uppgjörinu að fyrirtækið hafi sagt upp 75 starfsmönnum á tímabilinu, þar af 25 yfirmönnum.

Tap fyrsta ársfjórðungs 2014 nam 1,9 milljónum evra samanborið við 5,7 milljóna evra hagnað á fyrsta ársfjórðungi 2013. Hagnaður á hlut var neikvæður um 0,25 evru sent.

Handbært fé frá rekstri fyrir fjármagnsliði og skatta nam 19,4 milljónum evra á fyrsta ársfjórðungi 2014. Nettó vaxtaberandi skuldir í lok fjórðungsins námu 208,4 milljónum evra.

Sala á stöðluðum lausnum og tækjum jókst á milli ára á meðan markaður fyrir stærri verkefni hefur enn ekki tekið við sér. Rekstrarhagnaður á starfsemi Marel í kjúklingaiðnaði var lægri en venjulega á fyrsta ársfjórðungi sem rekja má til óhagræðis í framleiðslu og verkefna sem voru tekin við erfiðar markaðsaðstæður á síðasta ári.

Fram kemur í tilkynningu frá Marel að búast megi við því að kjúklingaiðnaðurinn muni skila bættri arðsemi í öðrum ársfjórðungi byggt á stöðu pantanabókar.

Afkoma fyrsta ársfjórðungs er einnig lituð af áhrifum nokkurra einskiptisliða sem samtals nema um 2,4 milljónum evra. Sá kostnaður eru ekki liður í hagræðingaráætluninni og er þar af leiðandi ekki bókaður sem einskiptiskostnaður.

„Tekjur Marel á fyrsta ársfjórðungi námu 155 milljónum evra og leiðréttur rekstrarhagnaður nam 4,6 milljónum evra sem er ekki í samræmi við getu félagsins. Áætlun okkar um skýrari rekstraráherslur (e. Simpler, smarter and faster) var hleypt af stokkunum í upphafi árs og gengur samkvæmt áætlun,“ segir Árni Oddur Þórðarson, forstjóri Marel.

„Á fyrsta ársfjórðungi höfum við náð þeim áfanga að draga úr árlegum kostnaði sem nemur 3,6 milljónum evra. Við tökum ákveðin skref í þá átt að samþætta einingar og hámarka framleiðslukerfið með það að leiðarljósi að gera fyrirtækið skilvirkara. Stefna Marel er skýr og markaðsstaðan sterk en við þurfum að aðlaga reksturinn betur að stefnu félagsins til að ná arðsemi í samræmi við samkeppnisstöðu.“

Í kjúklingaiðnaði kynnti Marel til leiks tvær vel heppnaðar lausnir, Robobatcher og SensorX SmartSort.

„Á sama tíma erum við spennt fyrir FleXicut sem búast má við að valdi straumhvörfum í hvítfiskvinnslu. Eins og við sögðum í upphafi árs teljum við að rekstrarhagnaður muni aukast þegar líður á árið. Til skemmri tíma litið eru miklir möguleikar fyrir Marel í Bandaríkjunum og í S-Ameríku þar sem þörf framleiðenda er að aukast eftir endurnýjun og stækkun. Marel er í góðri stöðu til að grípa þau tækifæri. Í Evrópu eru markaðsaðstæður hinsvegar litaðar af vaxandi spennu í Úkraínu. Á nýmörkuðum byrjar árið með miklum sveiflum á fjármálamörkuðum en langtímahorfur fyrir okkar iðnað eru góðar“.