Þrettán manns sagt upp hjá Símanum

Þrettán manns hefur verið sagt upp hjá Símanum vegna endurskipulagningar og hagræðingar.  Skipulagsbreytingin á að auka aðgreiningu milli fjarskiptaþjónustu og upplýsingatækni og hefur nýtt svið verið stofnað sem snýr að rekstri, þjónustu, vöruþróun og sölu á upplýsingatækni.

Orri Hauksson, forstjóri Símans segir þessar breytingar framhald á þeim áherslubreytingum sem unnið hafi verið að á undanförnum mánuðum.

„Með því að skerpa fókusinn með þessum hætti og með því að efla samstarf milli Símans og öflugra dótturfélaga skapist spennandi tækifæri. Það eru  einnig mjög mikil tækifæri til sóknar og hagræðingar í upplýsingatækni fyrir minni fyrirtæki. Þeim hluta munum við áfram sinna innan annarra deilda Símans,“ segir Orri.

Guðmundur Stefán Björnsson verður framkvæmdastjóri Upplýsingatæknisviðs Símans en hann hefur gegnt starfi framkvæmdastjóra Sölu- og þjónustusviðs.

Birna Ósk Einarsdóttir kemur til með að taka við af honum en áður stýrði hún markaðssetningu og vörum. Magnús Ragnarsson kemur nýr til starfa hjá félaginu og tekur hann við hlutverki Birnu. Magnús er einn tveggja aðstoðarmanna Illuga Gunnarssonar, menntamálaráðherra.