Vilja nýta þekkingu Íslendinga á jarðhita

„Samstarfið við Portúgal lofar mjög góðu og með þessari ferð og erindum íslenskra ráðgjafafyrirtækja þá kann að vera að samskipti landanna aukist á næstu árum,“ segir Jónas Ketilsson, verkefnisstjóri hjá Orkustofnun.

Hann var á sunnudag staddur á Asóreyjum í Portúgal ásamt íslenskri sendinefnd sem fylgdi Ragnheiði Elínu Árnadóttur, iðnaðar- og viðskiptaráðherra, þegar samstarfsáætlun Þróunarsjóðs EFTA á sviði jarðvarma á Asóreyjum var kynnt.

„Það kom skýrt fram á tvíhliða fundi forseta heimastjórnar Asór­eyja og iðnaðarráðherra að það væri sterkur vilji af þeirra hálfu að nýta þekkingu Íslendinga á sviði jarðhita til raforkuvinnslu og einnig til beinnar nýtingar,“ segir Jónas. Hann segir fundarmenn einnig hafa rætt reynslu heimamanna af nýtingu vindorku.

Í frétt á heimasíðu atvinnuvega- og nýsköpunarráðuneytisins segir að ráðherra hafi einnig fundað með aðstoðarorkumálaráðherra Portúgals, Artur Trindale, um mögulega samvinnu ríkjanna á sviði orkumála. Þar sé meðal annars horft til aðkomu Þróunarsjóðs EFTA.

„Tveir portúgalskir nemendur munu koma til Íslands í vor og sækja sex mánaða nám Jarðhitaskólans og einnig verða haldin sér námskeið á Asóreyjum, en megináhersla samstarfsáætlunarinnar er að reisa þriggja megavatta jarðvarmavirkjun á eyjunni Terc­eira,“ segir Jónas.