Ný útlán Íslandsbanka á árinu námu 100 milljörðum króna

Aðalfundur Íslandsbanka var haldinn í dag og flutti Friðrik Sophusson, stjórnarformaður, skýrslu stjórnar og Birna Einarsdóttir, bankastjóri, fór yfir uppgjör bankans og helstu þætti í starfsemi hans á árinu 2013 en frá þessu er greint í tilkynningu frá bankanum.

Friðrik fór yfir starfsemina á árinu 2013 og sagði frá því að Íslandsbanki hafi greitt samtals 12,4 milljarða króna í skatta og gjöld til hins opinbera að meðtöldum eftirlitsgjöldum. Þar af nemi bankaskatturinn 2,3 milljörðum króna. 

Friðrik sagði mikilvægt að ríkisstjórnin standi við orð sín því að þessi mikla skattlagning á tekjustofna eins og skuldir og laun dragi stórlega úr hagræði í bankakerfinu og dragi einnig úr áhrifum þeirra fjölmörgu aðgerða sem Íslandsbanki hefur gripið til á undanförnum árum til þess að lækka kostnað og hagræða í rekstri. 

Friðrik sagði einnig ljóst að þeir sem færu með eignarhaldi bankans í dag væru ekki framtíðareigendur bankans. Markmið þeirra væri að selja bankann strax og aðstæður leyfa.

„Ég vil sérstaklega taka fram að núverandi eigendur bankans hafa aldrei reynt að hafa áhrif á ákvarðanir stjórnar bankans í því skyni að draga taum eigenda á annarra kostnað. Slitastjórn Glitnis, sem á, í gegnum tvö dótturfélög, 95% hlut í bankanum, hefur lýst áhuga sínum á að skrá bankann á markað,“ sagði Friðrik í dag.

Birna Einarsdóttir sagði árið 2013 einkennast af góðum árangri og samþættingu í rekstri. Allar viðskiptaeiningar hefðu sýnt góða afkomu sem hefði skilað sér í heildarafkomu bankans. 

Að auki væru allar viðskiptaeiningar með góða markaðshlutdeild og eru í fararbroddi hvað þjónustu og fagmennsku varðar.

Á árinu 2013 voru augljóst merki um að hjól atvinnulífsins væru farin að snúast að nýju en ný útlán Íslandsbanka á árinu námu 100 milljörðum króna. Um 60 milljarðar eru ný útlán frá viðskiptabankasviði og 40 milljarðar frá fyrirtækjasviði.