Opnar á fjórfjöldun á kaupaukum starfsmanna fjármálafyrirtækja

Bjarni Benediktsson fjármálaráðherra hefur lagt fram frumvarp fyrir þingið sem opnar á fjórfjöldun á kaupaukum starfsmanna fjármálafyrirtækja.

Verði frumvarpið að lögum má veita starfsmönnum kaupauka sem nemur allt að 100% af árslaunum að ákveðnum skilyrðum uppfylltum. Þetta kemur fram í Viðskiptablaðinu í dag.

Í frumvarpinu er gert ráð fyrir að ef kaupauki á að vera hærri en 25% af árslaunum, þurfi heimild hluthafafundar til að hækka hlutfallið upp í 100%. Til að fá slíka heimild þarf samþykki minnst tveimur þriðju atkvæða hluthafa og þurfa þeir sem greiða atkvæði í þeirri kosningu að ráða að minnsta kosta yfir helmingi hlutafjár.

Í frumvarpinu kemur fram að:

„Kaupaukakerfi skal miða að því að kaupaukar:

    a.     hvetji ekki til óhóflegrar áhættutöku, 

    b.     vinni ekki gegn langtímahagsmunum fyrirtækis og stöðugleika fjármálakerfis, 

    c.     samræmist sjónarmiðum um vernd viðskiptavina fyrirtækis, kröfuhafa og hluthafa eða stofnfjáreigenda, og 

    d.     samræmist að öðru leyti eðlilegum og heilbrigðum viðskiptaháttum.“