Farþegamet slegið í hverjum mánuði frá ársbyrjun 2012

„Mánuð eftir mánuð hefur hvert metið rekið annað í fjöldatölum erlendra ferðamanna, eða allt frá því í ársbyrjun 2012,“ segir í Morgunkorni greiningar Íslandsbanka. Þá má gera ráð fyrir að erlendum ferðamönnum muni fjölga um 20 prósent í það minnsta í ár.

Þá segir að brottfarir erlendra ferðamanna frá landinu hafi verið 165 þúsund á fyrstu þremur mánuðum ársins og er það fjölgun upp á 35 prósent á milli ára. „Tölur Isavia um úthlutuð stæði yfir tímabilið 30. mars til 25. október, benda til þess að flugumferð um KEF verði 18% meiri á því tímabili en hún var á sama tímabili í fyrra.“

Miðað við það og að hófleg fjölgun verið einnig á síðustu tveimur mánuðum ársins má búast við 20 prósent fjölgun ferðamanna á milli ára.

Samkvæmt tölum frá Ferðamálastofu komu um 16.600 ferðamenn til landsins með Norrænu í fyrra. Þá hefur ferðamönnum sem koma hingað til lands með skemmtiferðaskipum fjölgað hratt og Greining Íslandsbanka segir að sennilega verði þeir fleiri en 100 þúsund á árinu. Þeir skili þó þjóðarbúinu mun minni gjaldeyristekjum en aðrir ferðamenn.

Einnig segir í Morgunkorninu að hlutfallslega hafi ferðamönnum fjölgað meira utan háannatíma og verulega hafi dregið úr árstíðasveiflu í ferðamannastraumi til landsins.

Sé árinu skipt í þrjú tímabil, janúar – maí, júní – ágúst og september – desember, hefur aukningin verið mest á fyrsta tímabilinu.

„Á milli áranna 2010 og 2013 fjölgaði erlendum ferðamönnum um 90% á fyrstu fimm mánuðum ársins, 52% yfir háannatímann og 86% á síðustu fjórum mánuðum ársins.“