Toyota mun kalla inn 2587 bíla á Íslandi

„Það verða kallaðir inn 2587 bílar hér á landi,“ Páll Þorsteinsson, upplýsingafulltrúi Toyota á Íslandi.

Bílarisinn Toyota ætlar að innkalla rúmlega 6,8 milljónir bifreiða um heim allan á næstunni, vegna fimm atriða sem nýlega hafa komið í ljós og geta skapað hættu. Páll segir að í Evrópu sem um að ræða þrjár mismunandi innkallanir.

„Um er að ræða galla í leiðslum í loftbúðum sem geta slitnað, galla í gormi í brautum undir framsætum og síðan endurbætur á festingu í stýrisstöng.“

Í rúmum helmingi bílanna þarf að skipta um rafmagnssnúru sem tengist loftpúðanum í stýrinu en þegar því er snúið er hætta á að snúran skemmist, þannig að púðinn virki ekki þegar á reynir.

Aðrir gallar eru bilaðar rúðuþurrkur og galli í startara sem gæti orsakað íkveikju en að sögn Páls eru þeir gallar aðeins staðbundnir við Japansmarkað.

„Allt í allt eru þetta 6.760.000 bílar sem er verið að kalla inn en sumir þeirra eru í tveimur innköllunum og því er um að ræða 6.390.000 einstaka bíla.“

Páll segir að innkallanir á Íslandi verða að kostnaðarlausu fyrir eigendur Toyota bifreiða.

Toyota fullyrðir að gallarnir hafi enn ekki leitt til óhappa eða banaslysa, svo vitað sé. Gallana er að finna í 27 gerðum af Toyota bílum.