Óvíst hvort Vodafone áfrýi ákvörðun PFS

Póst- og fjarskiptastofnun (PFS) hefur komist að þeirri niðurstöðu að fjarskiptalög gilda um þann atburð sem átti sér stað 30. nóvember síðastliðinn þegar tölvuþrjótur braust inn í vefkerfi Vodafone og stal þaðan sms-skilaboðum og persónuupplýsingum um þúsundir viðskiptavina félagsins og birti þær á netinu.

Vodafone hefur haldið því fram að það sé vafamál hvort vefkerfið, „Mínar síður“, falli undir fjarskiptalög eða ekki og þar með valdssvið PFS. Stofnunin hefur nú birt ákvörðun sína en rannsókn PFS á umræddu innbroti, og þá hvort Vodafone hafi brotið lög með því að geyma gögn lengur en í sex mánuði, er enn í gangi.

„Þetta er eitt af uppgjörunum sem við erum að fara í gegnum og við erum að meta stöðuna og skoða þetta,“ segir Ómar Svavarsson, forstjóri Vodafone á Íslandi (Fjarskipta hf.).

„Þetta í sjálfu sér breytir ekki afstöðu okkar en við vorum að útskýra með hvaða hætti við horfðum á Mínar síður. Við horfðum ekki á þær sem hluta af fjarskiptakerfum en sannarlega að sá búnaður sem notaður var til að senda upplýsingarnar væri hluti af kerfunum. En þetta er úrskurður PFS og við munum í framhaldinu meta hvort við munum áfrýja en engin slík ákvörðun hefur verið tekin,“ segir Ómar.

Minnti á það sem máli skiptir

Árásin á vefkerfi Vodafone kom í kjölfarið á viðburðaríku tólf mánaða tímabili sem hófst með skráningu félagsins á markað í desember 2012. Á þeim fjórum mánuðum sem liðnir eru hefur hlutabréfaverð Vodafone hækkað um sautján prósent eftir mikið fall daginn eftir árásina og félagið skilaði í síðasta mánuði ársuppgjöri sem sýndi hagnað upp á 847 milljónir króna.

„Þetta er eitthvað sem maður vill alls ekki upplifa aftur,“ segir Ómar, um persónulega upplifun sína af árásinni í lok nóvember og afleiðingum hennar.

„Þetta er búið að reyna alveg svakalega á og minnti mann á hvað það er sem skiptir máli og að hafa vakandi auga með því. En auðvitað er þetta eitt af þeim málum þar sem þú lendir í ákveðnum atburði eða stöðu þar sem skiptir öllu máli að taka réttu ákvarðanirnar, styðja við starfsfólkið og upplýsa út á við. En þetta voru virkilega erfiðir tímar sem reyndu á.“

Ómar sendi viðskiptavinum Vodafone bréf í síðustu viku þar sem hann fór yfir þær aðgerðir sem félagið hefur ráðist í til að efla öryggismál. Þar segir að fyrirtækið hafi meðal annars breytt kerfislegri uppbyggingu heimasíðunnar vodafone.is, eflt innbrotavarnir með nýjum eldveggjum og aukið samstarf við Vodafone Group.

„Það er gríðarlega gott bakland. Starfsmenn Vodafone Group hafa aðstoðað okkur við ýmis tæknileg atriði og þá miðað við alþjóðlega staðla enda er ógnin alþjóðleg í sjálfu sér. Allt er þetta gert til að upplýsa heiðarlega hvernig málin fóru og hvað gerðist í raun og veru.“

Vodafone hefur ekki gefið upp hversu margir viðskiptavinir sögðu skilið við fyrirtækið í kjölfar árásarinnar. Fyrstu dagana á eftir var talað um að fjöldinn væri innan við eitt prósent af viðskiptavinum og að sögn Ómars var desember ekki stærsti brottfallsmánuðurinn í sögu félagsins. Síðan þá hafa fjölmiðlar fjallað um að hópmálssókn gegn félaginu sé í undirbúningi.

„Í stóra samhenginu eru þetta ekki þannig tölur að þær hafi einhver veruleg áhrif. En þetta reyndi á alla þræði rekstursins og auðvitað hættu viðskiptavinir og það eru okkur ­gríðarleg vonbrigði. Stærstu viðskiptavinirnir sýndu okkur mikla tryggð og traust og það má segja að okkar ljós í gegnum þessar áskoranir hafi verið það traust sem viðskiptavinir hafa sýnt okkur.“

Fyrsti fjórðungurinn oft erfiður

Hagnaður Vodafone á síðasta ári hækkaði um 112 prósent miðað við árið á undan.

„Flestir okkar lykilmælikvarðar líta vel út og við erum mjög stolt af árinu og það endar á mjög viðburðaríkan hátt. Auðvitað er áskorun varðandi tekjurnar þar sem við erum að lækka um eitt prósent. Frumframlegðin er hins vegar að aukast og við erum að ná að halda rekstrarkostnaðinum í skefjum.“

Ómar vill lítið segja um hverju fjárfestar og aðrir megi búast við þegar uppgjör fyrsta fjórðungs þessa árs verður kynnt.

„Fyrsti fjórðungur hefur oft verið erfiðasti fjórðungurinn og hann er óútreiknanlegur. En við sjáum til hvort við getum ekki fylgt eftir góðum ársfjórðungum.“

Stefnt að arðgreiðslum

Aðalfundur Vodafone verður haldinn á Hilton Nordica hóteli í dag. Núverandi stjórnarmenn sækjast þar eftir endurkjöri og Vilmundur Jósefsson, fyrrverandi formaður Samtaka atvinnulífsins, hefur einnig boðið sig fram til stjórnarsetu, en Vilmundur sat áður í stjórninni.

„Þetta sýnir að það er áhugi fyrir fyrirtækinu. Við höfum notið stuðnings og hvatningar og eðlilega krafna frá stjórninni í þeim verkefnum sem við höfum tekist á við,“ segir Ómar.

Á aðalfundinum verða einnig lagðar fram tillögur stjórnar um að 20-40 prósent af hagnaði ársins verði greidd út í arð.

„Það er eitthvað sem ekki hefur verið gert áður. Stjórnin lofaði á síðasta aðalfundi að leggja til stefnu varðandi arðgreiðslur en við munum ekki greiða út arð vegna ársins 2013 heldur er verið að samþykkja stefnuna fyrir næsta ársuppgjör,“ segir Ómar.

Gagnabyltingin rétt að hefjast

„Áskoranirnar núna tengjast því hvernig við getum vaxið og þá ætlum við að horfa til þeirra tækifæra sem eru til að auka tekjur,“ segir Ómar og bætir því við að fyrirtækið hafi unnið að stefnumörkun þar sem horft sé til næstu þriggja ára.

„Við höfum séð að tekjur af þessum hefðbundnu fjarskiptavörum, mínútur og sms og allt það, þær eru í besta falli að haldast eða eitthvað að minnka. Ég tala þá ekki um samkeppnina sem kemur alls staðar frá, hvort sem það er Face­book, Google, Whatsapp, Viber eða Skype,“ segir Ómar.

Tækifæri fyrirtækisins liggja að hans mati í auknum gagnaflutningi og öðrum tekjustraumum eins og sjónvarpsþjónustu Vodafone. 

„Við höfum sagt að þessi gagnabylting sé rétt að hefjast.“

Annað framtíðarverkefni er sameining farsímadreifikerfa Vodafone og Nova í eitt alhliða kerfi. 

„Það mál er inni á borði samkeppnisyfirvalda en það hefur engin niðurstaða komið í það en mínar væntingar standa til þess niðurstaða fáist í apríl. Og svo er spurning með Emerald-sæstrenginn sem við höfum samið um afnot af en nú er útlit fyrir að hann verði tekin í notkun snemma árs 2015. Við erum því bjartsýn varðandi þessi verkefni sem koma til með að móta framtíð Vodafone.“