Almennt útboð á hlutabréfum HB Granda

Hlutabréf í HB Granda munu fara í almennt útboð dagana 7. -10. apríl næstkomandi. Fyrirtækið birti í dag lýsingu í tengslum við almennt útboð á hlutum í félaginu og ósk stjórnar félagsins um að öllu útgefin hlutabréf í HB Granda verði tekin til viðskipta á Aðalmarkaði NASDAQ OMX Iceland hf.

Heildarfjöldi útgefinna hluta í HB Granda nemur 1.822.228.000, en þar af á félagið eigin hluti sem nema 0,47% af heildarfjölda hlutanna. Allir útgefnir hlutir í félaginu eru í sama flokki og jafn réttháir.

Stærð útboðsins nemur 27% af útgefnum hlutum, nánar tiltekið 492.001.560 hlutum. Arion banki hf. áskilur sér rétt til að stækka útboðið í allt að 583.112.960 hluti eða sem samsvarar 32% af áður útgefnu hlutafé.

Markmið seljenda með útboðinu er samkvæmt lýsingunni, annars vegar að það geri HB Granda kleift að uppfylla skilyrði NASDAQ OMX Iceland hf. um dreifingu hlutabréfa sem tekin eru til viðskipta á Aðalmarkaði kauphallarinnar og hins vegar horfa seljendur til þess að selja eign sína á sem hagstæðustu verði.

Niðurstöður útboðs verða birtar almenningi á Evrópska efnahagssvæðinu í síðasta lagi mánudaginn 14. apríl 2014. Ekki liggur fyrir hvenær fyrsti mögulegi viðskiptadagurinn með hlutabréfin verður en það verður tilkynnt seinna.