Fjármagnshöftin kosta Íslendinga allt að 80 milljarða á ári

Það er mat Viðskiptaráðs Íslands að fjármagnshöftin gætu hafa dregið úr útflutningi innan alþjóðageirans um allt að 80 milljarða króna árið 2013.

Fjármagnshöftin og áhrif þeirra á fyrirtæki innan alþjóðageirans voru mikið rædd á nýafstöðnu Viðskiptaþingi. Fimm árum frá setningu eru höftin enn til staðar og engin opinber áætlun um afnám þeirra liggur fyrir.

Viðskiptaráð hefur nú lagt mat á áhrif haftanna á nýliðun og vöxt fyrirtækja innan alþjóðageirans. Sú upphæð jafngildir um einni milljón króna í gjaldeyri á hverja fjölskyldu landsins.

Trúverðug áætlun til afnáms hafta þjónar lykilhlutverki ef koma á í veg fyrir að þessi skaði aukist enn frekar. Slík áætlun þarf að vera heildstæð og styðja við vaxtargrundvöll fyrirtækja í alþjóðlegri starfsemi segir í greinagerð Viðskiptaráðs Íslands.

Í því felist að ekki sé eingöngu tekið á afmörkuðum hlutum vandans, líkt og bönkum í slitameðferð, heldur horft til þess hvernig megi afnema höft á alla aðila á sem skemmstum tíma.

Í skoðuninni kemur m.a. fram að alþjóðageirinn óx hratt á meðan flæði fjármagns var frjálst, en gerði það ekki innan hafta. Sé miðað við sögulegar tölur má áætla að fjármagnshöftin hafi dregið úr útflutningi alþjóðageirans um 78 milljarða króna árið 2013.