Spá óbreyttum stýrivöxtum

Greining Íslandsbanka spáir því að Seðlabankinn muni halda stýrivöxtum óbreyttum á næsta ákvörðunarfundi, sem verður 19. mars næstkomandi. „Við reiknum hins vegar með að tónninn í yfirlýsingu peningastefnunefndarinnar muni breytast úr vaxtahækkunartón í að nefndin opni á hugsanlega vaxtalækkun á næstu mánuðum,“ segir í Morgunkorni Greiningar Íslandsbanka.

Þá segir að rökin fyrir nýjum tón verða lægri verðbólguvæntingar, hröð minnkun verðbólgu undanfarið ásamt sterkari krónu.

Ennfremur spáir Greining Íslandsbanka að nefndin muni halda stýrivöxtum bankans óbreyttum út árið. „Áhættan í þeirri spá er í þá veru að hugsanlega muni nefndin lækka vexti á tímabilinu.“

Frá síðustu vaxtaákvörðun í febrúar hefur verðbólga lækkað úr 3,1 prósenti í 2,1. Þar skiptir miklu máli styrking krónunnar og bendir flest til að verðbólgan á fyrsta fjórðungi ársins verði undir spá Seðlabankans. Hún var 2,7 prósent.

„Spáum við 2,5% verðbólgu á fjórðungnum. Seðlabankinn reiknaði með í spá sinni að verðbólgumarkmiðinu yrði ekki náð fyrr en á síðasta fjórðungi ársins og því ljóst að það er að gerast fyrr en bankinn reiknaði með,“ segir í Morgunkorninu.