Tap upp á 360 milljónir króna

Rekstrarhagnaður Advania fyrir afskriftir (EBITDA) árið 2013 nam 1.315 milljónum króna samanborið við 341 milljón árið áður. Heildarafkoma samstæðunnar var hins vegar neikvæð um 360 milljónir króna.

Heildartekjur samstæðunnar jukust um 2,5% á milli ára og voru 26.478 milljónir króna samanborið við 25.829 milljónir árið á undan.

Gestur G. Gestsson, forstjóri Advania, segist í tilkynningu samstæðunnar vera sáttur við afkomu ársins 2013.

„Ársreikningurinn 2013 staðfestir jákvæða þróun í rekstri samstæðunnar. Rekstrarhagnaður fyrir afskriftir jókst umtalsvert á milli ára og heildarafkoman batnaði verulega þó að hún hafi áfram verið neikvæð. Með markvissum aðgerðum hefur rekstri í Noregi verið snúið til betri vegar og sú þróun mun halda áfram. Þá hefur hlutfall erlendra tekna af veltu á Íslandi aukist talsvert á milli ára sem eykur breidd í tekjumyndun Advania á Íslandi. Í því felast tækifæri til vaxtar á þröngum heimamarkaði en rekstrarumhverfi í greininni hefur af ýmsum ástæðum verið erfitt á síðustu árum,“ segir Gestur. 

Hjá Advania starfa um eitt þúsund starfsmenn á tuttugu starfsstöðvum á Íslandi, í Svíþjóð og Noregi. Um 46% prósent af veltu samstæðunnar árið 2013 var á Íslandi, 42% í Svíþjóð og 12% í Noregi.