Mikill vöxtur í einkaneyslu

Útlit er fyrir að vöxtur einkaneyslu muni mælast umtalsverður á fyrsta fjórðungi ársins. Þetta kemur fram í Morgunkorni Greiningar Íslandsbanka. Vöxturinn er þá að mestu leyti til kominn vegna mikillar aukningar í netverslun erlendis, ekki síst í kínverskum netverslunum.

Raunvöxtur í kortaveltu einstaklinga milli ára var 6,1% í febrúar og þar af jókst kortavelta innanlands að raungildi um 4,5 prósent en velta erlendis um 24,1 prósent. Þá segir í Morgunkorninu að vöxturinn hafi verið heldur hægari en í janúar, þegar hann var 7,5 prósent.

„Þó er hér tvímælalaust um býsna myndarlegan vöxt að ræða, og samanlagt hefur kortavelta landsmanna aukist að raungildi um 6,9% það sem af er 1. fjórðungi ársins frá sama tíma í fyrra. Þar af nemur vöxturinn innanlands 5,4% en vöxturinn erlendis ríflega 24%.“

Nánar má lesa um vöxtinn hér.