CCP tapaði 2,4 milljörðum

Bókfært tap tölvuleikjaframleiðandans CCP á árinu 2013 nam 21, 3 milljónum Bandaríkjadala, eða tæpum 2,4 milljörðum íslenskra króna.

Þetta kemur fram í ársuppgjöri fyrirtækisins sem opinberað var í dag.

Tapið er tilkomið vegna aukningar í afskriftum og niðurfærslu óefnislegra eigna.

„Þessi niðurfærsla hefur þó ekki áhrif á fjárstreymi félagsins,“ segir í tilkynningu frá félaginu.

„Gjaldfærður rannsóknar- og þróunarkostnaður jókst um 40 milljónir Bandaríkjadala vegna verulegrar aukningar í afskriftum auk niðurfærslu á eignfærðum þróunarkostnaði frá fyrri tímabilum. Þessi niðurfærsla, sem nemur alls 21,5 milljónum dala án skattaáhrifa, á sinn þátt í því að félagið skilar bókfærðu tapi og er liður í endurskoðun á þróunarferlum og vöru áætlunum félagsins fyrir árið 2014.“

Tekjur CCP jukust um 17,5% á milli ára, en þær námu 76,7 milljónum dala í fyrra. Framlegð nam 69,8 milljónum Bandaríkjadala miðað við 60,5 milljónir dala árið áður, sem er aukning um 15,5%

Hilmar Veigar Pétursson, framkvæmdastjóri fyrirtækisins segir að árið 2013 hafi verið mikilvægt fyrir CCP og að það hafi leitt til metárs í tekjum félagsins. „Hins vegar leiddi niðurfærsla óefnislegra eigna til bókfærðs taps á árinu,“ segir Hilmar í tilkynningunni.

„Við erum að gera upp fortíðina og taka tillit til breyttra forsenda og áherslubreytinga sem orðið hafa með það að leiðarljósi að styrkja og efla rekstur félagsins, sem og að skapa starfsfólki okkar og þróunarteymum réttar aðstæður til framtíðar“.