Birna Einarsdóttir viðskiptafræðingur ársins

Félag viðskiptafræðinga og hagfræðinga, FVH, hefur valið Birnu Einarsdóttur, bankastjóra Íslandsbanka, sem viðskiptafræðing ársins. Þetta er í tólfta sinn sem FVH veitir þessa útnefningu.

Í fréttatilkynningu segir að dómnefnd hafi meðal annars horft til þess að Birna hafi leitt uppbyggingu bankans frá því í lok árs 2008. Birna er sögð hafa góða stjórnunarhæfileika og leiðtogahæfni á erfiðum tímum.

Í dómnefnd sátu Örn Valdimarsson, formaður FVH, Auður Björk Guðmundsdóttir, framkvæmdastjóri hjá VÍS, Jón G. Hauksson, ritstjóri Frjálsrar verslunar, Margrét Guðmundsdóttir forstjóri Icepharma og Jafet Ólafsson, viðskiptafræðingur.