Applicon vann alþjóðlega nýsköpunarkeppni

Applicon bar sigur úr býtum í alþjóðlegri nýsköpunarkeppni SAP í Þýskalandi þar sem 40 fyrirtæki víðs vegar að úr heiminum tóku þátt. SAP er leiðandi í framleiðandi á viðskiptahugbúnaði í heiminum í dag.

Verðlaunaverkefnið, sem var lagt fyrir dómnefnd SAP, byggist á nýrri tegund af gagnagrunni fyrir bankakerfi SAP.

„Gagnagrunnurinn geymir öll gögn í minni og getur náð 10 þúsund sinnum meiri hraða auk þess að einfalda kerfishögun og lækka kostnað,“ segir Ingimar G. Bjarnason, framkvæmdastjóri Applicon á Íslandi, í tilkynningu frá Nýherja.

Hann segir að lausnin hafi þróast út frá SAP HANA gagnagrunni, sem spáð er að verði alls ráðandi á markaði innan skamms tíma, en ennfremur sé lausnin tengd við skýrslulausn frá SAP Business Objects.

Verðlaunaféð nam 80 þúsund evrum og auk þess hlýtur Applicon aðstoð frá sérfræðingum SAP við að ljúka við gerð verkefnisins.

Ingimar segir að verðlaunaféð muni nýtast við að ljúka við þróun á gagnagrunninum en ekki sé síður mikilvægt að njóta aðstoðar sérfræðinga SAP sem muni víkka þekkingu og reynslu Applicon. Hann segir að félagið hafi á síðustu 2 árum lagt mikla áherslu á nýsköpun, en í dag fari um 20% af veltu þess í þróun og þekkingaröflun.

„Okkar hlutverk felst í að sinna nýsköpun enda breytingar miklar og örar á því sviði sem við störfum. Árangurinn í keppninni er staðfesting á því að við erum á réttri braut,“ segir Ingmar.

Applicon á Íslandi sérhæfir sig í ráðgjöf, þjónustu og þróun lausna fyrir SAP, Vigor og Microsoft hugbúnað. Hjá því starfa 50 manns. Félagið er í eigu Nýherja.