Skuggasveinn valinn besti tölvuleikurinn

Tölvuleikurinn Skuggasveinn var valinn besti leikurinn í keppninni Game Creator sem haldin var á Háskóladögum í Háskólanum í Reykjavík á laugardag.

Liðið Indjánagil hlaut 1. verðlaun fyrir leikinn en það er skipað Örvari Kárasyni og Sveinbirni Örvarssyni. Í leiknum þarf Skuggasveinn að ferðast um borð á misjöfnu erfiðleikastigi. Markmiðið er að komast í gegnum borðið heill heilsu, finna lykla og komast á næst borð.

Vinningsliðið hlaut meðal annars 140 þúsund krónur frá Arion Banka, vinnuaðstöðu og leiðsögn í þrjá mánuði hjá Nýsköpunarmiðstöð Íslands.

Fjögur önnur lið hlutu sérstakar viðurkenningar: Crying Pig með leikinn P.I.L.L., The Flying Dutchman Games fyrir Tom & Moonfury - Adventure Through Afterlife, Sokoban fyrir leikinn Modulus og DragonFish fyrir Juice Ball.

„Þetta er í þriðja sinn sem Game Creator leikjakeppnin fer fram. Keppnin fór fyrst fram árið 2010 þar sem Clockwork Alien bar sigur úr bítum og árið eftir sigraði lið Lumenox þar sem nú starfa átta manns að framleiðslu leiksins Auru’s Awakening á skrifstofu fyrirtækisins í Hafnarfirði. Tilgangur Game Creator er að efla nýsköpun í íslenskri leikjaframleiðslu og gefa nýju fólki og liðum tækifæri á að koma fram og kynna hugmyndir sínar og leikjahönnun," segir í tilkynningu Samtaka iðnaðarins um keppnina.