Davíð deildarstjóri hjá Höfuðborgarstofu

Davíð Samúelsson hefur verið ráðinn deildarstjóri markaðs- og kynningardeildar Höfuðborgarstofu. Umsóknir voru metnar út frá þeim óskum um menntun, reynslu og hæfni, sem fram komu í auglýsingu um starfið.

Davíð er með BSc gráðu í ferðamálafræði frá Háskóla Íslands auk þess að hafa lokið leiðsögumannsprófi. Davíð hefur starfað í framvarðarsveit íslenskrar ferðaþjónustu síðastliðin 14 ár og hefur gegnt stöðu framkvæmdastjóra Markaðsstofu Suðurlands frá árinu 2010 þar sem hann hefur leitt markvissa uppbyggingu, samstarf sveitafélaga og fyrirtækja og margvíslegt markaðsstarf.

Davíð hefur gegnt trúnaðarstörfum tengdum ferðaþjónustu bæði innanlands og utan það er í starfshópi stjórnvalda um gjaldtöku á ferðamannastöðum og í fagráði ferðaþjónustu hjá Íslandsstofu. Þá sat Davíð einnig í stjórn EUTO European Tourist Officers í fjögur ár.