Hagnaður Sjóvár minnkar um tæpar 300 milljónir

Hagnaður Sjóvár eftir skatta nam 1.790 milljónum króna í fyrra samanborið við 2.057 milljónir árið 2012. Iðgjöld ársins jukust um 2,2% milli ára og námu námu 13.017 milljónum króna. Samsett hlutfall var 94,7% og helst nær óbreytt milli ára.

„Afkoma Sjóvár á árinu 2013 var góð og félagið er enn að vaxa að styrk. Samsett hlutfall helst lágt milli ára sem sýnir hve vel okkur hefur tekist að láta iðgjöld mæta tjónum og rekstrarkostnaði. Vátryggingareksturinn gengur því vel. Eiginfjárhlutfall félagsins er sterkt og gjaldþol þess hækkar. Starfsánægja hjá Sjóvá er mikil og þjónustukannanir staðfesta að viðskiptavinir okkar eru ánægðir með þjónustuna. Það hefur verið yfirlýst stefna eigenda að skrá Sjóvá á markað og áhersla okkar hefur verið lögð á að styrkja innviðina til að tryggja sem best að félagið sé vel undirbúið fyrir áskoranir framtíðarinnar,“ er haft eftir Hermanni Björnssyni, forstjóra Sjóvár í tilkynningu frá félaginu.

Stjórn Sjóvár samþykkti á síðasta ári að stefnt skyldi að skráningu félagsins á Aðalmarkað NASDAQ OMX Iceland. Undirbúningur fyrir það ferli hófst á sumarmánuðum og hefur gengið skv. áætlun. Stefnt er að því að hlutabréf félagsins verði tekin til viðskipta í apríl næstkomandi að undangengnu almennu útboði.