Flest flug til Lundúna og nágrennis

Fjórðungur ferða frá Keflavíkurflugvelli í febrúar var til Lundúna og nágrennis. Vefsíðan Túristi.is greinir frá þessu.

Kaupmannahöfn er í öðru sæti yfir þá áfangastaði sem oftast er flogið til og Osló í því þriðja eins og sjá má á töflunni hér fyrir neðan.

Til Lundúna fljúga þrjú flugfélög og það sama gildir um Osló. Það stefndi í álíka samkeppni um farþega á leið til Kaupmannahafnar en í síðustu viku ákváðu forsvarsmenn Norwegian að nýta sér ekki afgreiðslutíma sem þeir höfðu fengið í Keflavík fyrir flug til Kastrup. Icelandair og Wow Air verða því áfram ein á þeirri flugleið .

Í febrúar var boðið upp á áætlunarflug til tuttugu og þriggja borga frá Keflavíkurflugvelli og voru ferðirnar 618 talsins samkvæmt talningu Túrista.