Sér fyrir endann á kreppunni

Hagnaður Landsbankans á árinu 2013 nam tæpum 29 milljörðum króna. Bankastjóri Landsbankans segir að nú sé farið að sá fyrir endann á fjármálakreppunni á Íslandi. Hann óttast þó mikla skattbyrði íslenskra fjármálafyrirtækja.

Það gekk vel hjá íslensku bönkunum á síðasta ári. Heildarhagnaður stóru bankanna þriggja nam tæpum 65 milljörðum króna. Landsbankinn skilar mestum hagnaði og er eini bankinn þar sem hagnaður eykst á milli ára. Ríkissjóður nýtur góðs af góðum rekstri Landsbankans og mun fá 20 milljarða króna í arð vegna reksturs ársins 2013.

„Bæði eru tekjur að aukast og gjöld að lækka,“ segir Steinþór Pálsson, bankastjóri Landsbankans. Hagnaður Landsbankans er 3,3 milljörðum meiri en á síðasta ári og skýrist það einkum af lækkun rekstrarkostnaðar. Útibú Landsbankans voru 50 talsins eftir sameiningu við Sparisjóðinn í Keflavík 2011. Starfsfólki bankans hefur fækkað á síðustu árum og útibú eru 34 í dag.

„Það er búið að gera mikið. Við höfum hagrætt í höfuðstöðvum, fækkað útibúum og yfir línuna erum við að reyna að starfa með skilvirkari hætti,“ segir Steinþór.

Greiddi 12 milljarða í skatt

Landsbankinn greiddi 12,3 milljarða í skatta á síðasta ári og jókst skattheimtan um tæp 200% á milli ára. Steinþór telur að fjármálafyrirtæki geti ekki staðið undir svo mikilli skattbyrði til lengri tíma.

„Það er skiljanlegt að það sé verið að skattleggja bankana á þessum tímapunkti. Við urðum fyrir gríðarlegum kostnað í þessu landi vegna hrunsins og ríkissjóður þurfti að taka á sig miklar byrgðir,“ segir Steinþór. „Þó hagnaðurinn sé góður núna þá verðum við til lengri tíma litið að huga að því að við séum ekki með of mikla skatta.“

Landsbankinn hefur greitt um 120 milljarða upp í skuld sína við gamla Landsbankann á síðustu tveimur árum. Steinþór segir að það muni taka mörg ár að greiða upp þá skuld sem stendur í tæpum 240 milljörðum í dag. Öllu bjartara sé hins hins vegar yfir íslenska fjármálamarkaðnum.

Er kreppan búin?

„Kreppan er sem betur fer að verða búin en erum þó ekki alveg komin út úr henni. Ríkissjóður er með miklar skuldir og mikil vaxtagjöld. Mörg heimili og fyrirtæki eru ekki enn búin að ná fótum sínum að nýju en vonandi klárum við þetta á þessu ári,“ sagði Steinþór Pálsson, bankastjóri Landsbankans.