Vélarnar ruku í gang

Búðarhálsvirkjun var gangsett við hátíðlega athöfn í dag. Á þriðja hundrað manns fylgdust með gangsetningu vélanna.

Ragnheiður Elín Árnadóttir, iðnaðar- og viðskiptamálaráðherra, gangsetti fyrri vélina og Bjarni Benediktsson, fjármála- og efnihagsráðherra, þá seinni við mikið lófaklapp viðstaddra.

Búðarhálsvirkjun er virkjun í Tungnaá sem nýtir fallið í ánni frá frávatni Hrauneyjafossvirkjunar að Sultartangalóni. Með tilkomu Búðarhálsvirkjunar má segja að búið sé að fullnýta fall frá Þórisvatni niður fyrir Búrfell. Uppsett afl verður um 95 MW og orkugeta allt að 585 GWst á ári.

Framkvæmdum er nýlokið og er góð stemmning á meðal gesta í virkjuninni sem eru mættir í tilefni dagsins. Aðeins minniháttar verkþáttum er ólokið og í sumar verður farið í lokafrágang svæðisins og verkefnið fullklárað.