Verð á matvælum hefur hækkað töluvert á 18 mánuðum

Þegar skoðaðar eru verðkannanir verðlagseftirlits ASÍ þann 14. ágúst 2012 og 25. febrúar 2014 kemur í ljós að talsverðar hækkanir hafa verið í öllum vöruflokkum. Þetta kemur fram í tilkynningu frá ASÍ, en bornar voru saman 52 vörur í níu verslunum um allt land.

Verslunin Iceland bauð upp á 41 af þeim 52 vörum sem bornar voru saman og höfðu allar nema ein hækkað í verði. Aðeins 24 vörur voru til í 10/11, en  óbreytt verð var á átta vörutegundum, lækkað á tveimur og hækkað á 14. Sjá mátti einstöku verðlækkanir hjá öllum verslunum. Nettó lækkaði verð í 16 tilvikum af 44, Fjarðarkaup í 12 af 49 og Nóatún í 12 af 36.

Verð á mjólkurvörum hefur hækkað í öllum verslunum að meðaltali um fimm prósent, þrátt fyrir einstöku lækkanir. Þá hafa SS pylsur hækkað um 14 prósent hjá Iceland, 10 prósent hjá Krónunni, 8 prósent hjá Bónus, 7 prósent hjá Samkaupum – Úrval, 6 prósent hjá Nettó, 4 prósent hjá Fjarðarkaupum, 2 prósent hjá 10/11 og um 1 prósent hjá Hagkaupum.

Nánar má lesa um verðhækkanir hér.