Ferðaþjónusta stærsta útflutningsatvinnugrein landsins í fyrra

Ferðaþjónusta var stærsta útflutningsatvinnugrein landsins í fyrra en útflutningstekjur af henni voru 26,8 prósent af heild. Er það í fyrsta sinn sem útflutningstekjur ferðaþjónustu eru meiri en útflutningstekjur af sjávarútvegi, en þær námu 26,5 prósentum. Hlutfall ferðaþjónustunnar í útflutningstekjum jókst um rúmlega þrjú prósent milli ára.

Helga Árnadóttir, framkvæmdastjóri Samtaka ferðaþjónustunnar, segir þetta afar ánægjuleg tíðindi. „Þetta er í takt við það sem við gerðum ráð fyrir,“ segir Helga. „Það var vöxtur í fjölda ferðamanna sem komu í fyrra og ánægjulegt að hann virðist halda áfram.“

Þá segir Helga að tölur janúar- og febrúarmánaðar í ár líti vel út. „Það er gaman að sjá hve mikil fjölgun er á þessum árstíma. Það er ekki langt síðan var lítið um að við sæjum ferðamenn yfir svartasta skammdegið.“

Helga segir stjórnvöld verða að veita atvinnugreininni athygli á við aðrar. „Það vantar rannsóknir á þessari grein eins og öðrum, bæði hvað varðar almennar upplýsingar, til dæmis um fjölda starfandi í greininni, og  ekki síður þolmarkarannsóknir. Við verðum að byggja upp innviðina og gera það hratt, enda eigum við mikið inni. Þetta eru sannarlega jákvæð tíðindi en nú reiðir á að ganga í takt.“