Árið byrjar rólega á fasteignamarkaði

Árið hefst frekar rólega á fasteignamarkaði höfuðborgarsvæðisins. Vísitala leiguverðs lækkaði um 0,6% á milli desember og janúar og er nú á sama stað og í ágúst í fyrra en þetta kemur fram í tilkynningu frá Hagfræðideild Landsbankans.

Sé litið til lengri tíma er ekki hægt að sjá að leiguverð hafi að jafnaði hækkað meira en kaupverð húsnæðis undanfarin misseri. Verð á fjölbýli hefur lækkað tvo mánuði í röð, alls um 0,8%. Verð á sérbýli hefur hins vegar farið hækkandi tvo síðustu mánuðina. Viðskipti með fasteignir eru ennfremur töluvert færri en var á fyrstu mánuðum ársins 2013. Það virðist því sem eitthvert hik sé komið í þróum markaðarins upp á við, t.d. varðandi hækkun á verði fjölbýlis, en einnig viðskipti almennt.

Ætla má að margir haldi að sér höndum og bíði niðurstöðu um áform stjórnvalda um lækkun höfuðstóls verðtryggðra húsnæðislána sem vænta má í vor. Á síðustu tveimur árum hefur tæplega 10% af viðskiptum með íbúðir á miðsvæði Reykjavíkur verið sala einstaklinga til fyrirtækja. Viðskipti af þessu tagi hafa aukist að undanförnu, en eru þó ekki mikið meiri en var á árunum 2006-2009.