Yggdrasill hlýtur alþjóðleg verðlaun

Fyrirtækið Yggdrasill hefur hlotið alþjóðlega viðurkenningu frá fæðubótaframleiðandanum NOW sem besti samstarfsaðili framleiðandans 2014 (e. The Best Global Partner Award). Yggdrasill jók sölu á vörum NOW um 100% milli ára en enginn annar samstarfaðili hefur náð slíkum árangri.  

NOW velur ár hvert alþjóðlegan samstarfsaðila sem hefur náð hvað mestum árangri í markaðsstarfi á vörumerkjum fyrirtækisins en þær eru seldar í 70 löndum víðsvegar um heiminn.

Sirrý Svöludóttir sölu- og markaðsstjóri Yggdrasils telur þetta vera mikla viðurkenningu fyrir fyrirtækið. „Síðasta ár var gífurlega krefjandi og því erum við hjá Yggdrasil afar stolt  að fá þessa staðfestingu á vel unnu starfi“.

Fyrirtækið leggur áherslu á framleiðslu fæðubótarefna, matvara og snyrtivara án aukaefna en Yggdrasill hefur dreift vörum fyrirtækisins í yfir áratug.

Yggdrasill hefur verið starfandi á Íslandi síðan 1986 og sérhæfir sig í innflutningi, sölu og dreifingu á lífrænum vörum, fæðubótarefnum og öðrum heilsuvörum.

Hér að neðan má sjá myndband frá afhendingu viðurkenningarinnar.