Boðar samráð við stjórnarandstöðu um breytingar á Seðlabanka

Til greina kemur að fjölga bankastjórum Seðlabankans í þrjá í frumvarpi sem fjármálaráðherra boðar um bankann. Ekki sé verið að hverfa til fortíðar og sjálfstæði Seðlabankans verði tryggt. Núverandi bankastjóri sækist eftir að gegna starfinu áfram.

Fjármálaráðherra segir tímabært að endurskoða lög um Seðlabankann nú þegar fimm ár eru liðin af skipunartíma núverandi bankastjóra og ætlar að skipa starfshóp til að endurskoða lögin.

Eins sé rétt að skoða mörkin á milli núverandi starfsemi bankans og Fjármálaeftirlitsins. Breytingarnar miði að því að gera bankanum betur kleift að sinna faglegu hlutverki sínu og í engu verði kvikað frá sjálfstæði bankans. Til greina komi að fjölga bankastjórum í þrjá eða setja tvo aðstoðarbankastjóra með aðalbankastjóra.

Er ekki verið að hverfa til fortíðar í þessum efnum eða til fyrra horfs í Seðlabankanum?

„Nú segir þú að við ætlum að snúa til fyrra horfs. Ég er að segja að við ætlum að koma á fót starfshópi til þess að betrumbæta löggjöfina um Seðlabankann og tryggja enn betur en á við í dag. Ég segi að þessar breytingar horfi til framtíðar, þetta er framsækin aðgerð en ekki eitthvað sem horfir til fortíðar og það er ekki fólgið í þessu neitt afturhvarf til fortíðar,“ segir Bjarni Benediktsson fjármálaráðherra.

Þegar lögum um Seðlabankann var breytt árið 2009 hafi það gerst á skömmum tíma og án samráðs við þáverandi stjórnarandstöðu. Breytingarnar nú feli ekki í sér vantraust á núverandi bankastjóra, sem sagði í yfirlýsingu í dag að hann hyggðist sækjast eftir að starfa áfram, með þeim fyrirvara að lagabreytingar feli ekki í sér breytingar á eðli starfsins eða á umsóknarferlinu sjálfu.

„Við gerum þetta að vel athuguðu máli með því að koma á fót starfshópi. Þar sem við leitum eftir sjónarmiðum og ég mun kalla eftir samstarfi við stjórnarandstöðuflokkana um undirbúning að þessum breytingum. Það kalla ég að vinna að málinu með faglegum og vönduðum undirbúningi,“ segir Bjarni.

Ríkisstjórnin hefur ekki alltaf verið sátt við ákvarðanir núverandi stjórnenda bankans.

Eru þetta viðbrögð við því að Seðlabankinn hafi ekki verið nógu hlýðinn eða ekki á pari við þá stefnu sem ríkisstjórnin hefur tekið í efnahagsmálum?

„Nei. Ég hef rakið það í nokkuð löngu máli að það eru gild rök til þess nú þegar fimm ára reynsla er komin á síðustu breytingar að leggja mat á hvernig þær hafa reynst,“ segir fjármálaráðherra.