Fundar um hugsanlegan raforkustreng milli Íslands og Bretlands

Ragnheiður Elín Árnadóttir iðnaðar- og viðskiptaráðherra mun funda með orkumálaráðherra Bretlands í næsta mánuði. Meðal annars til að ræða um hugsanlegan raforkustreng milli Íslands og Bretlands. Þetta kom fram í ávarpi ráðherra á aðalfundi Samorku í dag.

Ráðherra sagði mikilvægt að skoða forsendur þessa verkefnis vel og vandlega. Vinna á grundvelli álits ráðgjafahóps og nefndarálits atvinnuveganefndar Alþingis er þegar hafin í ráðuneytinu. Ráðherra tók fram að hún teldi rétt að forræði málsins færðist algerlega til stjórnvalda.

Ragnheiður Elín tók jafnframt undir með ályktun aðalfundar Samorku um mikilvægi þess að sátt næðist um rammaáætlun. Hún sagðist ekki hafa farið leynt með það að henni þætti nauðsynlegt að endurskoða nokkur atriði þeirrar rammaáætlunar sem samþykkt var á liðnu ári. Áætlunin væri á skjön við faglega vinnu sem unnin hafi verið fyrir meðferð málsins á Alþingi.

Mikilvægi uppbyggingar flutningakerfis raforku á Íslandi var meðal þess sem Ragnheiður Elín fjallaði um á fundinum. Í því sambandi nefndi hún meðal annars væntanlegt frumvarp til breytinga á raforkulögum þar sem efla á formlega stöðu kerfisáætlunar Landsnets.