Fjölbreytt tækifæri fyrir konur í sjávarútvegi

Félagið Konur í sjávarútvegi hélt sinn fyrsta kynningarfund í síðustu viku í húsakynnum Íslandsbanka, sem er aðalbakhjarl félagsins. Í tilkynningu frá félaginu segir að mæting hafi verið framar vonum en á fundinum mættu um hundrað konur.

„Tilgangur félagsins er að styrkja og efla konur sem starfa í sjávarútvegi ásamt því að gera þær sýnilegri innan iðnaðarins sem utan. Jákvæðni, samstaða og hjálpsemi eru meðal markmiða félagsins. Félagið hyggst ná markmiðum sínum með því að búa til öflugt tengslanet, virkja fleiri konur og skoða meðal annars menntamál kvenna í sjávarútvegi,“ segir í tilkynningunni.

“Við vitum nú þegar af fjölmörgum öflugum konum sem starfa í sjávarútvegi og við ætlum okkur að styrkja þennan hóp en jafnframt laða fleiri konur til greinarinnar,” sagði Berta Daníelsdóttir, framkvæmdastjóri sölu- og þjónustuskrifstofu Marel á Íslandi og talsmaður félagsins.

Í tilkynningunni segir að í sjávarútvegi séu fjölbreytt tækifæri fyrir konur, hvort sem það er í framleiðslu, hugbúnaðargerð, veiðum,markaðstarfi, vísindum eða hvers kyns nýsköpum. „Framtíðin er því björt og tækifærin öll okkar. Við viljum því ná til sem flestra kvenna sem starfa í sjávarútvegi og tengdum greinum auk þeirra sem ætla að gera þetta að framtíðarvettvangi sínum ,“ sagði Berta.

Á fundinum var fagráð félagsins kynnt en því er ætlað að vera stjórn félagsins innan handar og veita ráðgjöf við einstök verkefni. Einnig mun ráðið leiðbeina með stefnumótandi áherslur með það að leiðarljósi að efla ímynd og orðspor félagsins.

Fagráð Kvenna í sjávarútvegi skipa Sigurður Ingi Jóhannsson, Birna Einarsdóttir, Hildur Árnadóttir, Þorgerður Katrín Gunnarsdóttir og Árella Eydís Guðmundsdóttir.