Rúmlega 5,2 milljarða króna velta í Kauphöllinni

Töluverð viðskipti voru í Kauphöllinni í dag, en langmesta veltan var með hlutabréf Haga. Velta með þau hlutabréf var rúmir 5,2 milljarðar króna, en heildarvelta Kauphallarinnar var 5,63 milljarðar. Næst mest velta var með hlutabréf Icelandair, eða 329 milljónir króna.

Hlutabréf Össurar voru þau einu sem hækkuðu í verði eftir daginn, en þau hækkuðu um 0,77 prósent, með einnar milljónar króna veltu. Þá stóðu Reginn og Vodafone í stað. Öll önnur hlutabréf lækkuðu í verði og heildarvísitalan lækkaði um 1,83 prósent og stendur í 1.217,43 stigum.

Mesta lækkunin var á hlutabréfum Icelandair, 2,89 prósent, Hagar lækkuðu næstmest, 2,67 prósent, Eimskip lækkaði um 1,01 prósent, Marel um 0,86 prósent, VÍS um 0,85 prósent, N1 um 0,79 prósent og TM lækkaði um 0,66 prósent.

Arion Banki seldi stóran hlut í hlutabréfum Haga í dag sem og fjárfestarnirÁrni Hauksson og Hallbjörn Karlsson, en þessi viðskipti útskýra að miklu leyti háa veltu hlutabréfanna.