Sérstakar umræður um málefni Seðlabankans á Alþingi í dag

Katrín Jakobsdóttir, þingkona Vinstri grænna, mun standa fyrir sérstökum umræðum um málefni Seðlabankans klukkan 14:00 á Alþingi í dag.

Bjarni Benediktsson, fjármála- og efnahagsráðherra, mun verða til andsvara.

Í fréttatilkynningu frá þingflokki VG segir meðal annars; „Að undanförnu hefur farið fram mikil umræða um sjálfstæði Seðlabanka Íslands í kjölfar ýmissa ummæla ráðherra um störf bankans og yfirstjórn hans, umræðu um að til standi að breyta lögum um Seðlabankann og loks ákvörðunar ríkisstjórnarinnar að auglýsa stöðu Seðlabankastjóra lausa til umsóknar.“

Þingfundur hefst klukkan 13:30 í dag en á dagskrá eru 22 mál. Í kjölfar umræðunnar um málefni Seðlabankans verður úttektarskýrsla utanríkisráðherra um aðildarviðræður að Evrópusambandinu tekin til umfjöllunar.

Því næst verður þingsályktunartillaga um ráðgefandi þjóðaratkvæðagreiðslu um áframhald aðildarviðræðna við ESB tekin til umræðu en fyrir henni mælir Jón Þór Ólafsson, þingmaður Pírata.

Að þeim loknum verður vakið máls á lagafrumvarpi fyrrgreinds fjármálaráðherra um gjaldskrárlækkanir en fyrir þingfundi liggja einnig umræður um Fiskeldi, náttúruvernd, Sundabraut og hagkvæmni lestarsamgangna á Íslandi.