Kaupmáttur sá sami og í ágúst 2006

Í nýrri Hagsjá Hagfræðideildar Landsbankans kemur fram að kaupmáttur launavísitölu hafi aukist töluvert á síðasta samningstímabili.

Tímabilið, sem stóð frá apríl 2011 fram til desember 2013 hækkaði launavísitalan um 24% og skilaði sú launahækkun 7,4% kaupmáttaraukningu.

„Því má segja að á tímabilinu hafi  rúmlega tveir þriðju hluta launahækkana hafi orðið verðbólgunni að bráð eða fóðrað hana,“ segir í Hagsjá.

Ef litið er til lengri tíma má áætla að um helmingi kaupmáttarfallsins sem varð í kjölfar hrunsins hafi verið náð til baka.

Kaupmáttur hækkaði í kjölfar samningsbundinna hækkana í febrúar og mars í fyrra en í desember síðastliðnum var kaupmáttur sá sami og hann hafði verið í mars sama ár.

Launavísitala hækkar

Launavísitalan hækkaði um 1,0% í janúar frá fyrri mánuði en vísitalan hefur alls hækkað um 6,7% undanfarna 12 mánuði.

Mestu áhrifin á launavísitöluna má rekja til kjarasamninga Samtaka atvinnulífsins og nokkurra aðildarfélaga Alþýðusambandsins en helmingur félagsmanna þeirra hefur fengið téða hækkun.

Hagfræðideild Landsbankans áætlar að launavísitalan hækki með svipuðum hætti í næsta mánuði komist fyrirhuguð 2,8% upphafshækkun launa hjá öðrum aðildarfélögum ASÍ.

„6,7% hækkun launa á ári er talsvert meira en gerist í nálægum ríkjum en eitt af markmiðum nýgerðra kjarasamninga virðist vera að reyna að byggja upp kaupmátt með minni launabreytingum,“ segir í lokaorðum Hagsjárinnar.