Ekki hægt að treysta endurreikningum hundrað prósent

Sigurvin Ólafsson, héraðsdómslögmaður, segir að lántakendur sem nýverið hafi fengið tilkynningar frá fjármálafyrirtækjum um endurreikning lána þurfi að skoða tilkynninguna gaumgæfilega.

Hann var gestur í Bítinu á Bylgjunni í morgun. Sigurvin ræddi í þættinum um opið bréf til þeirra sem tóku gengislán eða gerðu gengistryggða bílasamninga sem hann birti á Pressunni nýverið.

„Ég hef verið að halda lífi í þessu, bæði með að útskýra hvað hefur gerst og að benda á þessu er hvergi nærri lokið. Það á enn eftir að leiðrétta stóran hluta þessara lána,“ sagði Sigurvin í Bítinu.

Hann segist hafa reynt að koma málinu fram á mannamáli í greinum sínum. „Í þessar grein er ég að draga saman líf þess sem tók gengislán í mjög einfaldri mynd. Hann tók bara lán sem honum var boðið og það tvöfaldaðist eða þrefaldaðist 2008. Allt fór í hund og kött, næstu tvö eða þrjú ár hjá viðkomandi. Það er erfitt að borga af þessum lánum og á sama tíma er allt miklu erfiðara í samfélaginu,“ sagði Sigurvin.

Hann fer yfir sögu þessa einstaklings í greininni og kemur að lokum tveimur aðstæðum sem flestir lántakendur ættu að vera í.

„Núna er komið að skuldadögum eða sem sagt fjármálafyrirtækin telja sig vera búin að finna út úr þessu. Nú eru þau að senda út erindi til lántakenda. Þá er það annaðhvort tilkynning um að fólk fái leiðréttingu á láninu þannig að það verði lækkað eða jafnvel að fólkið fái eitthvað endurgreitt ef búið er að borga lánið upp og það hefur greitt of mikið. Það er hópur A.“

Sigurvin segir að það séu góðar fréttir en sá hópur þurfi samt að skoða það sem þeir fá gaumgæfilega.

„Hinn hópurinn fékk tilkynningu um að samkvæmt mati fjármálafyrirtækja eigi ekki að leiðrétta frekar útaf einhverjum túlkunum þeirra á dómi hæstaréttar. Ég tel að sá hópur þurfi líka að skoða gaumgæfilega tilkynninguna.“

„Án þess að ég sé að gruna banka eða fjármálafyrirtæki um græsku, skoðið gaumgæfilega þessar tilkynningar sem þið fáið. Jafnvel þó þið fáið tilkynningu um að þið eigið að fá eitthvað endurgreitt. Annað hvort rennið þið sjálf yfir þær eða fáið einhvern til að gera það. Ég get fullyrt að það er ekki hægt að treysta þessu hundrað prósent,“ segir Sigurvin.