Gerðu kjarakaup á húsbúnaði

Náttúruminjasafn Íslands hefur sent frá sér yfirlýsingu í kjölfar fréttar Markaðarins um dýrkeypta endurnýjun húsbúnaðar Fjármálaeftirlitsins. Í henni kemur fram að ráðdeild fyrirfinnist einnig í fjármálum ríkisstofnana.

Náttúruminjasafn gerði kjarakaup í síðustu viku þegar stofnunin keypti notuð húsgögn á uppboði á vegum Ríkiskaupa. Í tilkynningunni segir að um hafi verið að ræða vandaða íslenska framleiðslu frá Á. Guðmundssyni, hillur og skrifborð klædd mahognyspæni, alls 17 hillu- og skápaeiningar og þrjú skrifborð með skúffuvögnum á hjólum.

„Í fagurfræðilegu tilliti falla notuðu húsgögnin einkar vel að yfirbragði og því innbúi sem var fyrir í húsnæði Náttúruminjasafnsins, gömlu Loftskeytastöðinni á Melunum, með mahognyklæddu trégólfi og nokkrum mahognymublum,“ segir í tilkynningunni.

Notuðu húsgögnin voru keypt af embætti Sérstaks saksóknara og Ríkislögreglustjóra og kostuðu samtals 265.000 kr.

Nýi notaði húsbúnaðurinn mun nýtast til að innrétta þrjú skrifstofuherbergi auk bókastofu.