Ferðamenn eyða minna en kortaveltan eykst

Kortavelta ferðamanna jókst um 26,5% á milli ára. Þetta kemur fram í úttekt Rannsóknarseturs verslunarinnar.

Í janúar í fyrra var þessi veltuaukning 56% frá sama mánuði árinu þar áður.

Aukninguna má einna helst rekja til fjölgunar ferðamanna en ekki til þess að hver ferðamaður eyði meira en áður.

Kortavelta á hvern ferðamann dróst saman um 10% á milli ára, fór úr 114 þúsund kr. árið 2013 í 103 þúsund í janúar í ár.  Þessa þróun má hugsanlega rekja til þess að ferðamenn dvelji hér skemur en áður.

Mikil sprenging hefur orðið í sölu innlendra skoðunarferða til erlendra ferðamanna en aukningin nemur 49% á milli ára.

Eftirtektarvert er að það er hærri upphæð en ferðamenn greiddu fyrir gistiþjónustu, sem hingað til hefur verið stærri útgjaldaliður. Skoðunarferðir kostuðu ferðamenn um 1,2 milljarða kr. í janúar en gistiþjónustan 963 milljónir.

Samkvæmt tölum rannsóknarsetursins voru erlendir ferðamenn þyrstir í íslenska menningu en til dæmis má nefna að velta í janúar í söfnum og galleríum jókst um 64% og á tónleika og í leikhús jókst erlend kortavelta um 46% frá janúar í fyrra.

Þó hefur ásókn ferðamanna í innlandsflug dregist saman sem nemur 2% og kortavelta þeirra í sjóflutningar dróst saman um 40%. Það helst í hendur við 37% aukningar kortaveltu hjá bílaleigum landsins milli ára.