Ófullnægjandi mönnun hjúkrunarfræðinga eykur dánartíðni

Niðurstöður nýrrar rannsóknar  sýnir fram á að ófullnægjandi mönnun hjúkrunarfræðinga hefur bein áhrif á dánartíðni sjúklinga eftir skurðaðgerðir.

Niðurstöður sýna fram á að hafi hjúkrunarfræðingur sex sjúklinga í umsjá sinni í stað átta sé dánartíðni sjúklinga eftir skurðaðgerðir 30% lægri en ella. Þá er einnig talið að hver sjúklingur sem bætist í hóp hjúkrunarfræðings, umfram hverja sex sjúklinga, geti aukið dánartíðni sjúklinganna um sjö prósent.

Jafnframt er sýnt fram á að með aukinni menntun hjúkrunarfræðinga, þar sem BS-gráða er lægsta menntunarstig, lækki dánartíðni sjúklinga sem gengist hafa undir skurðaðgerðir.

„Við tökum þessu fagnandi af því að við viljum að það verði skilgreint hversu mörgum sjúklingum má sinna hverju sinni svo öryggi sjúklinga sé að fullu tryggt. Við viljum koma á einhverju kerfi,“ segir Ólafur G. Skúlason, formaður Félags hjúkrunarfræðinga.

Ólafur segir sjúklingana almennt veikari en áður og álagið þar af leiðandi meira. Hann segir misjafnt hversu mörgum sjúklingum hjúkrunarfræðingur sinnir, en alla jafna sé það um átta til tíu sjúklingar á hvern hjúkrunarfræðing. Oft meira að nóttu til.

„Rannsóknin sýnir hvaða áhrif hjúkrun hefur á lifun sjúklinga. Hjúkrun skiptir máli.“

Gögn rúmlega 422 þúsund sjúklinga sem undirgengst höfðu almennar skurðaðgerðir voru rannsökuð. Rannsóknin var gerð í níu löndum í Evrópu.