„Þetta uppgjör markar ákveðin þáttaskil hjá samstæðu Nýherja“

Nýherji, Applicon og TM Software skiluðu öll jákvæðri afkomu árið 2013 en þetta kemur fram í fréttatilkynningu frá Nýherja.

Fram kemur að rekstur innlendra dótturfélaga hafi gengið vel og horfur framundan mjög góðar. Rekstur Nýherjasamstæðunnar á erlendum vettvangi var hins vegar þungur á síðasta ári, einkum hjá Applicon A/S í Danmörku, sem skýrir að langstærstum hluta tap samstæðunnar á árinu.

Viðvarandi tap hefur verið af rekstri Applicon A/S undanfarin ár og af þeim sökum hefur viðskiptavild vegna félagsins verið skrifuð niður um 1.100 milljónum króna á árinu.

„Applicon A/S er nú í söluferli og Dansupport A/S í Danmörku var selt í lok árs, en lítil sem engin samlegð hefur verið milli reksturs í Danmörku og á Íslandi. Báðar þessar aðgerðir eru í takti við nýja stefnu Nýherjasamstæðunnar og aðgerðaáætlun, þar sem megináhersla er lögð á að einfalda starfsemi, bæta afkomu og styrkja stöðu félagsins," segir Finnur Oddsson forstjóri Nýherja hf.

„Þetta uppgjör markar ákveðin þáttaskil hjá samstæðu Nýherja.  Við horfum nú til tækifæranna sem felast í því að nýta okkur sterka stöðu á markaði og mjög samkeppnishæft vöru- og lausnaframboð til að þjónusta stóran hóp öflugra viðskiptavina.  Að sama skapi væntum við áframhaldandi vaxtar erlendra tekna vegna sölu hugbúnaðarlausna sem þróaðar eru af dótturfélögum Nýherja, einkum TM Software," segir Finnur.