Sæunn forstöðumaður Stofnunar rannsóknasetra HÍ

Sæunn Stefánsdóttir hefur verið ráðin forstöðumaður Stofnunar rannsóknasetra Háskóla Íslands. Frá þessu greinir í frétt á heimasíðu háskólans.

Sæunn lauk BS-prófi í viðskiptafræði frá Háskóla Íslands 2003 og hefur frá árinu 2007 verið sérfræðingur á skrifstofu rektors Háskóla Íslands. Þá var hún verkefnisstjóri aldarafmælis Háskóla Íslands árið 2011. Áður en Sæunn gekk til liðs við Háskóla Íslands var hún aðstoðarmaður heilbrigðis- og tryggingamálaráðherra og síðar félagsmálaráðherra. Sæunn var alþingismaður á árunum 2006-2007.

Stofnun rannsóknasetra Háskóla Íslands tók til starfa 1998. Stofnunin er vettvangur samstarfsverkefna háskólans við sveitarfélög, stofnanir, fyrirtæki, félagasamtök og einstaklinga á landsbyggðinni. Markmið stofnunarinnar er enn fremur að styrkja tengsl Háskóla Íslands við atvinnu- og þjóðlíf í landinu og einnig rannsóknir á landsbyggðinni, bæði sjálfstæðar rannsóknir háskólans og rannsóknir í  samstarfi við aðra. Markmiðið er jafnframt að  nýta staðbundnar aðstæður í umhverfi og atvinnugreinum til rannsókna og auka þekkingu á þeim, stuðla að nánum tengslum fræðasviða og deilda háskólans við rannsóknasetur á landsbyggðinni og veita nemendum aðstöðu til vettvangsnáms.

Undir stofnunina heyra sjö rannsóknasetur. Þau eru á Hornafirði, Suðurlandi, Snæfellsnesi, Suðurnesjum, Vestfjörðum, Norðurlandi vestra og á Húsavík.

Stofnun rannsóknasetra Háskóla Íslands  heyrir undir háskólaráð Háskóla Íslands en um síðustu áramót var fyrirkomulagi á daglegri starfsemi, umsýslu og rekstri stofnunarinnar breytt með því að færa hana undir skrifstofu rektors í þeim tilgangi að skerpa á markmiðum og styrkja og efla samstarf við aðila á landsbyggðinni. Er það í samræmi við áherslur í stefnu Háskóla Íslands 2011-2016 og samning háskólans og mennta- og menningarmálaráðuneytis um kennslu og rannsóknir 2012-2016, um aukið samstarf við  rannsóknastofnanir, háskóla, fyrirtæki og menningarstofnanir. Eftir breytingarnar eru skýrari skil  á milli daglegs rekstrar og umsýslu stofnunarinnar annars vegar og faglegra málefna í samvinnu við fræðasvið og deildir hins vegar, sem fram fara á vettvangi rannsóknasetranna.

Sæunn mun áfram gegna starfi sérfræðings á skrifstofu rektors í hálfu starfi á móti hálfu starfi forstöðumanns Stofnunar rannsóknasetra Háskóla Íslands.